Ágætu Akureyringar nú er lag að leggja hönd á plóg

Í morgun barst á skrifstofuna eftirfarandi bréf frá Miðbæjarsamtökunum á Akureyri og þar sem málefnið er gott er um að gera að það fari sem víðast og því birtum við það hér á síðunni.

Mæðrastyrksnefnd hér á Akureyri er að vinna gríðarlega gott og öflugt starf í þágu þeirra sem minna mega sín.  Við hin sem höfum það sem við þurfum ættum að staldra við og hugsa til þeirra sem þurfa á aðstoð sem þessari að halda.

Hjá flestum okkar leynast vörur í geymslum eða á lagerum sem kæmu að betri notum hjá fjölmörgum einstaklingum en að liggja hjá okkur og safna ryki. Í versluninni GS Akureyriráðhústorgi 7 tökum við á móti varningi sem gefa á til mæðrastyrksnefndar.  Þetta geta verið vörur af ýmsum toga, vörur til heimilisnotkunar eins og jólaskraut,  jólagjafir handa stórum sem smáum, fyrir jólasveininn til að setja í skóinn og fleira. 

Næstkomandi laugardag verður kóraslóð í miðbæ Akureyrar.  Við fáum að njóta söngs víðs vegar í bænum sem endar á ráðhústorginu við jólatréð og jólaköttinn um kl 16:30  við það tækifæri ætlum við að afhenda mæðrastyrksnefnd það sem safnast hjá okkur. 

Hafa ber í huga að þessi söfnun kemur ekki í staðinn fyrir jólagjafasöfnun sem á sér stað á Glerártorgi heldur er hrein viðbót.

Pakkar afhendist frá og með deginum í dag til laugardags kl. 15 í GS Akureyri merktir innihaldinu á sér miða, eða sem t.d. gjöf fyrir 10 ára strák.

Prentið endilega út þennan póst og farið með hann í fyrirtækin sem eru sitt hvorum megin við ykkar rekstur, þannig verður dreifingin mest, og allir fá tækifæri til að vera með.

Með hátíðarkveðjum
Miðbæjarsamtökin á Akureyri