Varst þú að vinna um páskana?
Við minnum félagsfólk sem vann á skilgreindum frídögum og stórhátíðardögum um páskana á að halda vel utan um vinnutímana sína, fara yfir launaseðla og ganga úr skugga um að laun séu greidd samkvæmt réttum launataxta. Athugið að greiðsla launa fyrir þessa daga getur fallið á núverandi launatímabil og kemur þá til greiðslu um næstu mánaðarmót.
Starfsfólk á að halda föstum og reglubundnum launum á skilgreindum frí- og stórhátíðardögum. Samþykki starfsfólk að taka að sér vinnu á þessum dögum skal greiða sérstaklega fyrir þá vinnu, til viðbótar við greiðslu fyrir fastan og reglubundinn vinnutíma.
Frídagar
Á frídögum greiðist eftirvinna eða yfirvinna eftir því sem við á.
Frídagar:
- Skírdagur
- Annar í páskum
- Sumardagurinn fyrsti
- 1. maí
- Uppstigningardagur
- Annar í hvítasunnu
- Annar í jólum
Starfsmaður sem t.d. á vakt/vinnutíma á frídegi þar sem atvinnurekandi velur að hafa lokað á rétt á að fá tímana greidda í dagvinnu. Sinni starfsmaður vinnu á frídegi fær hann unna tíma greidda í eftirvinnu eða yfirvinnu eftir því sem við á.
Starfsmaður sem á t.d. átta tíma vakt samkvæmt vaktaplani á frídegi en vinnur aðeins sex tíma vegna styttri opnunartíma, fær þá unna tíma greidda í eftirvinnu eða yfirvinnu eftir því sem við á auk átta tíma í dagvinnu.
Stórhátíðardagar
Á stórhátíðardögum greiðist stórhátíðarálag.
Stórhátíðardagar:
- Nýársdagur
- Föstudagurinn langi
- Páskadagur
- Hvítasunnudagur
- 17. júní
- Frídagur verslunarmanna
- Jóladagur
- Eftir kl. 12:00 á aðfangadag og gamlársdag
Sá starfsmaður sem sinnir störfum á þessum dögum fær dagvinnutíma (skv. vaktaplani/umsömdum vinnutíma) greidda auk þeirra tíma sem unnir eru á stórhátíðardegi á stórhátíðarálagi.
Leitaðu til okkar!
Ef þið hafið einhverjar spurningar þá er ykkur velkomið að hafa samband í síma 4551050, senda línu á fvsa@fvsa.is eða líta við á opnunartíma.