Samstarfssamningur milli FVSA og Einingar-Iðju
Samstarfssamningur milli FVSA og Einingar-Iðju
Í morgun var skrifað undir samstarfssamning um nýtingu réttinda félagsmanna milli Félags verslunar- og skrifstofufólks Akureyri og nágrenni (FVSA) og Einingar-Iðju. Það voru Björn Snæbjörnsson, formaður Einingar-Iðju, og Eiður Stefánsson, formaður FVSA, sem undirrituðu samninginn. Samningurinn gildir í eitt ár og verður endurskoðaður mánuði áður en hann rennur út.
Markmið samstarfsins er að auðvelda félagsmönnum aðgang að áunnum réttindum þegar þeir skipta um félag vegna breytinga á starfsvettvangi. Þannig þarf félagsmaður ekki að bíða ávinnslutíma réttinda sinna heldur getur flutt milli félaga þau réttindi sem þegar hafa áunnist. Núverandi regla um 6 mánaða rétt eftir síðustu greiðslu gildir áfram en annars gildir sú regla að greitt hafi verið í a.m.k. 6 mánuði samtals til beggja félaga. Samstarfið felur í sér samnýtingu iðgjalda félagsmanna vegna fræðslusjóðs, orlofssjóðs og sjúkrasjóðs félaganna.
Fyrst félaga til að gera slíkan samning
Björn segir að félögin hafi í raun unnið á þessum nótum undanfarin ár en við ákváðum að setja þessar reglur á blað núna. „Ég veit ekki betur en að Eining-Iðja og FVSA séu þar með fyrst félaga innan ASÍ til að gera slíkan samning. Þetta er mikill gleðidagur því með þessu erum við að stíga stórt skref í að tryggja að réttindi fólks detti ekki niður þegar viðkomandi flytur sig á milli félaganna. Ég vona að svona samningur verði gerður við fleiri félög sem fyrst. Samningurinn mun líka verða til þess að við gerum meiri kröfu á að félagsmenn verði í þeim félögum sem hefur samningsumboð fyrir viðkomandi.“
Tímamótasamningur
Eiður segir að þetta sé tímamótasamningur. „Þetta gerir félagsmönnum auðveldara að fara á milli félaga og vera í réttu stéttarfélagi sem skiptir gríðarlega miklu máli. Þá er ég að tala um að vera í því stéttarfélagi sem er með þann kjarasamning sem starfsmaðurinn er að fá greidd laun eftir. Ég vona að þetta sé upphafið að fleiri sambærilegum samningum milli stéttarfélaga.“
