Þing AN vel heppnað
37. þing Alþýðusambands Norðurlands
Dagana 29. og 30. september fór fram 37. þing Alþýðusambands Norðurlands (AN). Alls sendu aðildarfélögin 77 þingfulltrúa á þingið, en þar af voru sjö frá Félagi verslunar- og skrifstofufólks Akureyri og nágrenni. Þetta er í fyrsta sinn frá árinu 2019 sem aðildarfélögin koma saman og því mikið um fagnaðarfundi. Að þessu sinni var þingið pappírslaust og gafst það vel.
Fjölbreytt dagskrá á þinginu
Dagskrá þingsins var fjölbreytt og erindi gesta fróðleg. Helga Þyrí Bragadóttir, verkefnastjóri og ráðgjafi hjá VIRK í Eyjafirði, sagði frá starfi og árangri VIRK. Næst fjallaði Ellen Jónína Sæmundsdóttir, forstöðumaður Vinnumálastofnunar á Norðurlandi eystra, um helstu verkefni, stöðu og framtíðarsýn stofnunarinnar. Ágúst Torfi Hauksson, forstjóri Kjarnafæðis Norðlenska ehf., sagði frá starfsemi fyrirtækisins og þeim áskorunum sem kjötvinnsla á Íslandi stendur frammi fyrir. Farið var yfir málefni trúnaðarmanna; Sirrý Laxdal frá FVSA, Elsa Hrönn Gray Auðunsdóttir og Sigríður Þórunn Jósepsdóttir frá Einingu-Iðju og Guðmunda Steina Jósefsdóttir frá Framsýn sögðu frá starfinu og viðhorfinu til þess. Björn Traustason, framkvæmdastjóri Bjarg íbúðafélags, fór yfir uppbyggingu félagsins og viðskiptamódelið á bak við það. Að lokum fór Jóna Finndís Jónsdóttir, forstöðumaður réttindasviðs Stapa, yfir það helsta í lífeyrismálum.
Samvinna og samstarf AN við Orlofsbyggðina á Illugastöðum
Trausti Jörundarson, formaður Sjómannafélags Eyjafjarðar, fór yfir samvinnu og samstarf Alþýðusambands Norðurlands og orlofsbyggðarinnar á Illugastöðum. Í framhaldinu var orðið laust um málefnið og í framhaldinu kynntu starfsmenn ASÍ, Bergþóra Hrönn Guðjónsdóttir og Guðrún Edda Baldursdóttir, fyrirkomulag hópavinnu sem fór fram með þjóðfundarfyrirkomulagi. Við tók málefnalegt og gott samtal í hópunum sem endaði á kosningu um málefni samstarfsins.
Deginum lauk með öðrum málum. Steig þá í pontu Bergvin Bessason, varaformaður Félags málmiðnaðarmanna á Akureyri, sem lagði til að rætt yrði um möguleikann að opna fyrir dýrahald í orlofsbyggðinni. Umræða skapaðist um málefnið og niðurstaða að leggja tillöguna fyrir stjórn Orlofsbyggðarinnar á Illugastöðum. Lauk þar fyrri degi þingsins.
Annar þingdagur
Annar dagur þingsins hófst á því að starfsmenn ASÍ kynntu niðurstöður úr hópavinnu frá deginum áður, sem voru í framhaldi lagðar fram til umsagnar og afgreiðslu. Þá tók við kynning á ársreikningum og fjárhagsáætlun AN, því næst var fjárhagsáætlunin borin upp til samþykktar og samþykkt einróma.
Kjör nýrrar stjórnar
Anna Júlíusdóttir, frá Einingu-Iðju, var kjörin nýr formaður AN til næstu tveggja ára. Önnur kosin í stjórn eru Aneta Potrykus, frá Verkalýðsfélagi Þórshafnar, sem er varaformaður stjórnar og Atli Hjartarsson, frá Öldunni stéttarfélagi, sem er ritari stjórnar. Varamenn í stjórn eru Vigdís Edda Guðbrandsdóttir, frá Samstöðu, Guðný Grímsdóttir, frá Framsýn, og Trausti Jörundarson, frá Sjómannafélagi Eyjafjarðar.
Félag verslunar- og skrifstofufólks Akureyri og nágrenni þakkar þingfulltrúum fyrir setu á þinginu fyrir hönd félagsins.